Хүний нөөцийн бодлогын хүрээнд

Компанийн дэвшүүлсэн зорилго, зорилтуудыг хэрэгжүүлэхэд шаардагдах хүний нөөцийн хэрэгцээг төлөвлөж тодорхойлох, түүнийг хангах, ажилтан бүрийн авъяас чадвар, нөөц боломжуудыг нээн илрүүлж хөгжүүлэх, идэвхжүүлэх, ажиллагсдын нийгмийн асуудлыг оновчтой зөв шийдвэрлүүлэх, ажилчдыг санаачлагатай ажиллахад уриалан дуудах, өмнөө тавьсан зорилгоо биелүүлэх хүсэл эрмэлзэлтэй байх орчин нөхцөлийг бүрдүүлэхэд үндсэн үйл ажиллагаагаа чиглүүлэн ажиллаж байна.

Боловсон хүчний бүрдэлтийг авч үзвэл дээд боловсролтой ажилтан нийт ажиллагсдын 20-иод хувийг, тусгай дунд боловсролтой ажилтан 5 орчим хувийг, МСҮТ төгссөн мэргэжилтэй ажилчид 25 хувийг, үйлдвэрлэл дээр мэргэшүүлж мэргэжил олгосон ажилчид 20 орчим хувийг эзэлдэг. Мэргэжилтэй ажилчид нийт ажилчдын 80 гаруй хувийг эзэлдэг.

Алба хэсгийг тухайн ажлын байранд тавигдах шаардлагад нийцсэн мэргэжилтэй боловсон хүчнээр хангах бодлого барин ажиллаж байна. Дулааны, ашиглалтын, засварын, цахилгааны, дулааны шугам сүлжээний, усны, химийн гэх мэт зайлшгүй мэргэжил, мэргэшил шаардсан ажлын байруудад тухайн мэргэжлийн инженер, техникийн ажилтанууд ажиллаж байна. Инженерүүдийн хувьд мэргэжлийн бакалавр болон түүнээс дээш зэрэгтэй 30 гаруй инженер ажилладаг бөгөөд үүнээс зөвлөх инженер 2, мэргэшсэн инженер 3 ажиллаж байна. Шинээр ажилд орж байгаа хүмүүст тодорхой мэргэжлийн шаардлага тавьж ажилд авч байгаа бөгөөд ажлын байранд давтан мэргэшүүлэх, мэргэжилгүй ажилчдыг ажлын байранд мэргэшүүлэх сургалтыг холбогдох сургалтын болон бусад хамтран ажиллагч байгууллагуудтай хамтран зохион байгуулдаг. Мөн түүнчлэн ажилчдад мэргэжлийн зэрэг олгох, мэргэжлийн зэргийг ахиулах ажлын хүрээнд мэргэжлийн инженерүүдээр хичээл заалган шалгалт авч мэргэжлийн зэрэг олгож байна.

Компанийн нийт ажилтан, ажилчдын бүтцийг насны ангиллаар авч үзвэл: 18-25 насны 10,5%, 26-35 насны 31%, 36-45 насны 28,4%, 46-60 насны 25%-ийг тус тус эзэлж байна. Ажилчдын дундаж нас 40,1 байна.